'NUTE NI THUCHAH'

By Major Lalthansanga

NUTE NI THUCHAH

“Naupang chu a kalna awm kawngah chuan zirtir ula, A upa hun pawhin a thlah lo vang. Naupang thinlungah chuan âtna a bet tlat a, Mahse thununna tiangin hla takah a hnawt kiang ang.”

(Thufingte  22:6, 15)

            Nute ni kan thlen hian tute thinlung ah mai pawh hian thil thar a lo awm thin a, thenkhat nute nen a hlim taka hmang thin te tan chuan mittui tlakna alo chang thin. Chu chuan Nute Ni hlutna leh ngainatna a lantir thin a, la hmang velo naupang tan chuan thilthar a ni a, mittui lo seng tawhtu tan pawh a hluin a thlakhlehawm a ni.

      Nute hlutna leh  mawhphurhna: A hmasa in Nu chuan a pasal leh fate chungah bul tumtu leh mawhphurhna a nei tih a inhriat hi a tul hle mai. A fate a enkawl ang bawkin a pasal chungah mawhphurhna a nei a ni tih an hriat a tul a. Pa tam tak chu naupang ang mai a enkawl leh buaipui ngai an tam mai a, Nu fel chuan mipa fel loh lang miah lovin inchhung a vawng thei. Kan Bible pawhin hetiangin a sawi:

“Hmeichhe khawsak tha chu a pasal tan lallukhum a ni a, Zahpuiawm tak thil ti erawh chu a ruh timawihtu a ni.” (Thufingte 12:4)

     Naupang thlahdah taka enkawl tu leh a tuartu hmasa ber chu Nu a ni a, a dawtah chhungkua in a tuar thin. Nu in nula ang mai a hunawl a neihtam hle chuan chhungkua a buai a, chhungkua pawhin zahawmna an hloh fo. Nu chuan a fate a hmangaih tlat avangin Pathian hriattir turin kohhran a hmelhriat tir ngei tur  a  ni.   Inkhawm rawh u, tih chu mi tam tak chuan an duh tawk a, keima hmuh leh hriat ngei nu thenkhat an fate ngaihsaklo, Pathian lama kaihhruai tum na pawh nei lo tam tak an awm.  Hetiang hi ringtute chet dan tur niin a lang lo.

     Nu chuan a fate chu Pathian thuin a kaihruai anga, inkhawm hunah an hruai ngei tur a ni. Chu chu thununna pawimawh tak a nih rualin Pathian hlauhawmzia leh hmangaihtu a nihzia a fate chu a hriattir a ni. Kan Pathian thu chuan hetiang hian a sawi a, “Lalpa tih nu-ah chuan rinna chak a awm a, a fate chuan humhimna hmun an nei ang.” a ti a ni. Chuvangin fate Pathian thu a kaihhruai hi thil tul ber ah neih tur a ni.

Pa mawhphurhna: Nu mawhphurhna kan sawi tawh a. Chhungkaw enkawl thu ah Pa hian mawhphurhna nasa tak a nei. Pa ber a awm that loh chuan fate chuan kawng diklo zawh an awlsam bik thin. Chuvang-in Pa chuan chhungkua a a mawhphurna chu a hlen ngei ngei tur a ni.

     Sam ziaktu chuan, “Fing taka awmtir chein i kalna tûr kawng chu ka entir ang chia; Ka mita en reng chung chein rem ka ruatsak zel ang che.” a ti. (Sam 32:8).

Naupangte tih tur: Nu leh pa mahni fate awmdan mawi leh tha zirtir lo an awm lovang. Pathian thu atanga zirtir hi a pawimawh ber fo. Kan Pathian thu ah naupang te tih tur a sawi a- “Naupangte u, Lalpaah chuan in nu leh in pate thu zawm rawh u; chu chu thil dik a ni si a. I nu leh i pa chawimawi rawh,(chu chu thupek tiam nei hmasa ber a ni.) Chutichuan, itan a tha ang a, leiah hian i dam rei bawk ang.” (Ephesi 6-1-3)

     Nu chuan a fate ei leh in, silh leh fen thu ah te mawhphurtu a nih avangin Pathian rawngbawlna chu a veiber ani tur ani a. EWnglai pawhin a fate tan entawntlaka nung turin Pathiana hnenah a intiam thar tharin a inhlan thar fo tur a ni.

            ““Tin, nangnin eng atan nge, ka thu zawm si lo va, ‘Lalpa, Lalpa,’ mi tih thin?” (Luka 6:46) tih a nih kha.